📌DOTTO
KWILASA.
ILI kuboresha
sekta ya Mawasiliano nchini, Serikali imeanzisha sekta mahsusi ya ujenzi
kusimamia miundombinu ya barabara, vivuko, nyumba, majengo yanayomilikiwa na
Serikali pamoja na viwanja vya ndege.
Mbali na majukumu hayo, pia ni kuhakikisha kuwa huduma zinazotolewa na sekta
hiyo zinaendana na mikakati ya Serikali ya kukuza uchumi na maendeleo ya jamii.
Hivi karibuni, Katibu Mkuu anayesimamia Sekta hiyo, Mhandisi Joseph Malongo,
alikukutana na watendaji wa taasisi zilizo chini ya sekta hiyo kwa dhumuni la
kuwakumbusha na kuwapa mwelekeo wa Serikali na matarajio ya wadau katika miradi
inayotekelezwa.
Katika kufanikisha hilo, Mhandisi Joseph Malongo, alianza kwa kuhakikisha
taasisi zote zenye malalamiko ya utoaji wa huduma kutoka kwa wadau anakutana
nazo na kujadili kwa pamoja namna ya kutatua changamoto hizo ili kuboresha
utendaji na huduma kwa wateja wa taasisi hizo.
Hivyo, alikutana na Wakala wa Ufundi na Umeme (TEMESA) wakati wa kuzindua
vitendea kazi vya karakana na viti vya wenye uhitaji maalum vitakavyotumika
kwenye vivuko vyote nchini.
AFANYA UTAFITI KAZI
Mhandisi Malongo alieleza kuwa alifanya utafiti kuhusiana na utendaji wa TEMESA kutoka kwa wadau mbalimbali.
Katibu Mkuu Malongo alieleza kuwa TEMESA imebweteka kwa sababu imepewa mamlaka
kisheria na Serikali kuwa ni taasisi pekee ya Serikali inayotengeneza magari na
mitambo.
Mbali na hilo, alieleza kuwa amegundua wafanyakazi wa TEMESA hawaendani na
mabadiliko ya teknolojia hususani katika masuala ya magari na mitambo, kwani
magari yanayonununuliwa na Serikali kwa sasa ni ya kisasa zaidi ambayo
yanahitaji utaalamu wa kipekee.
Alieleza kuwa pia alibaini uwepo wa ukiritimba unaofanywa na baadhi ya
watumishi wa TEMESA ambao si waaminifu kwani huduma zinacheleweshwa bila sababu
za msingi hata kwa matatizo yanayoweza kutatuliwa kwa muda mfupi.
Mhandisi Malongo alieleza kuwa wadau walimweleza kuwa baadhi ya vipuri
vinavyofungwa kwenye magari siyo halisi, hivyo kuharibika muda mfupi baada ya
gari kutoka karakana za TEMESA.
Mbali na hilo, Mhandisi Malongo alieleza kuwa wadau walilalamikia kuhusu huduma
mbovu zinazotolewa na TEMESA ikiwemo Karakana kutokuwa na sehemu ya mapumziko
na sehemu ya kuosha magari baada ya kupatiwa huduma.
“Nilivyoingia wizarani mwezi Aprili mwaka huu niliamua kufanya utafiti kwa
baadhi ya taasisi za serikali kuhusu utendaji wa TEMESA, nilifanya hivyo kwa
sababu nilikuwa mlalamikaji kuhusu huduma zinazotolewa na TEMESA, matokeo
niliyopata kutokana na utafiti wangu ni kuwa asilimia 75 ya niliowahoji
walisema kuwa TEMESA wamebweteka, pia wafanyakazi wao kutokuendana na
mabadiliko ya teknolojia,” Alisema Mhandisi Malongo.
ATOA MAAGIZO
Kutokana na malalamiko hayo, Mhandisi Malongo aliwataka TEMESA kubadilika na
kuwaagiza kuanzisha mkakati madhubuti ambao utaboresha huduma zao, kuongeza
ufanisi kwa watumishi ili kuvutia wateja ambao wamekuwa wakilalamika kuhusu
utoaji wa huduma.
Pia, aliwataka TEMESA kuhakikisha unaboresha mkakati wake wa kibiashara,
kuboresha usimamizi wa kifedha ambao utalenga kutoa huduma nzuri kwa wateja
wao.
Vilevile, aliagiza TEMESA kudhibiti gharama kubwa za matengenezo ambazo
zimekuwa zikilalamikiwa, hivyo alipendekeza kuwa makubaliano maalumu kati
ya Wakala huu na Wakala wa Huduma za Ununuzi Serikalini (GPSA) na Toyota
Limited yafanyike haraka badala ya kubaki kwenye maandishi.
Mhandisi Malongo pia aliaigiza TEMESA kuwajengea uwezo wahandisi 92 waliopo ili
wawe wabobezi katika fani zao mbalimbali, wapatiwe motisha ambayo itaongeza
chachu ya kujituma kwa ufanisi.
Mbali na kutoa maagizo hayo, Mhandisi Malongo, aliupongeza uongozi wa TEMESA
kwa jitihada ya kukusanya madeni wanayowadai wateja yenye thamani ya Shilingi
bilioni 27 kutoka Sh. bilioni 38.
Pia, aliwakumbusha kuwa wateja kutokulipa siyo sababu kwamba hawana fedha bali
hawaridhiki na huduma wanayopata kutoka TEMESA.
Naye Mtendaji Mkuu wa TEMESA, Mhandisi Japhet Maselle, aliomba kurudishwa kwa
mfuko wa matengenezo ya magari kwa ajili ya kupunguza madeni jambo ambalo
lilipingwa na Katibu Mkuu Mhandisi Malongo na kusema kuwa kutawafanya TEMESA
kuendelea kubweteka na kutotoa huduma bora kwa wateja.
MAFANIKIO/UFANISI WA TEMESA
Mhandisi Maselle, alisema kuwa katika kuboresha huduma za karakana TEMESA
imeendelea kukarabati karakana za mikoa ya Dar es Salaam zilizopo eneo la
Vingunguti, pamaoja na mikoa ya Mwanza na Mbeya.
Kuhusu ununuzi wa karakana sita zinazohamishika pamoja na vifaa 30 vya kuchunguza
ubovu na hitilafu za magari na mitambo, Mhandisi Maselle alisema kuwa vifaa
hivyo vitasambazwa katika mikoa ya kikanda ambayo ni Arusha, Mwanza, Mtwara,
Mbeya, Tabora na Dodoma.
Maselle alifafanua kuwa lengo la ununuzi wa karakana zinazohamishika ni kwa
ajili ya kusogeza huduma kwa wateja walio mbali na karakana za mikoa, pia kutoa
huduma ya matengenezo ya dharura yanayotokea maeneo yasiyo na karakana hasa
magari na mitambo yanapokuwa safarini au nje ya ofisi.
Aliongeza kuwa viti vya wenye mahitaji maalum vitakuwa msaada kwa abiria wenye
mahitaji maalum, kwamba awali huduma hiyo ilikuwa haitolewi kwenye vivuko vya
Serikali na kusababisha usumbufu kwa abiria wenye mahitaji hayo.
 |
|
Baadhi ya wafanyakazi
wa Wakala wa Ufundi na Umeme (TEMESA) wakifuatilia hotuba ya Katibu Mkuu wa
Wizara ya Ujenzi na Uchukuzi (Sekta ya Ujenzi),Mhandisi Joseph Malongo (hayupo
pichani), wakati wa uzinduzi wa vitendea kazi vilivyonunuliwa na Wakala huo,
Jijini Dodoma. |
Kuhusu vifaa vya kuchunguza ubovu wa hitilafu za magari na mitambo, Mhandisi
Maselle, alisema kuwa TEMESA imepanga kupeleka vifaa hivyo katika kila kituo na
kufafanua kuwa vifaa hivyo vitasaidia kubaini tatizo kwa usahihi na kwa muda
mfupi.
Alisema pia kutaboresha huduma na kupunguza muda wa matengenezo ya magari na
mitambo pamoja na malalamiko ya wateja kufungiwa vipuri visivyo halisi.
Mwenyekiti wa Bodi ya TEMESA, Profesa Idrissa Mshoro, aliiomba Serikali kupitia
wakala huo kuendelea kuajiri mafundi wa kutosha, ili kuongeza idadi ya mafundi
na kuwapatia ujuzi utakaoendana na mabadiliko ya teknolojia ambayo itawasaidia
kufanya kazi zao kwa ufanisi.
Zaidi ya Sh. milioni 765 zimetumika katika ununuzi wa vitendea kazi vya TEMESA,
ambapo kati ya hizo Sh. milioni 494 zilitumika kununua karakana sita
zinazohamishika, Sh. milioni 257 zilitumika kununua vifaa 30 vya kuchunguza
ubovu na hitilafu za magari na mitambo na Sh. milioni 13 zilitumika katika
ununuzi wa viti 33 vya wenye uhitaji maalum.
TEMESA imeanzishwa kwa Sheria ya Wakala Na. 30 yamwaka 1997 na marekebisho yake
ya mwaka 2009, ikipewa majukumu ya msingi ikiwa ni pamoja na kufanya
matenegenezo ya pikipiki, magari na mitambo ya Serikali pamoja na watu binafsi.
Mwisho.
0 Comments